(Smellið á myndina til að stækka.)
Veiðilækur hefur undanfarið verið í eigu Sigurðar Einarssonar, fyrrum stjórnarformanns í Kaupþingi, sem nú er landlaus skóggangsmaður.
Á jörðinni byggði Sigurður 900 fermetra sumarhöll með fimmtíu fermetra vínkjallara, þurrsánu, blautsánu, tugum klósetta og eigin borholu, svo eitthvað sé nefnt. Húsið er einungis fokhelt og stendur autt en þó hefur Sigurður sett upp í því nýtísku þjófavarnarkerfi.
Ákvörðunin um þjóðnýtingu jarðarinnar og hússins var tekin er ljóst var að Sigurður myndi ekki ljúka við byggingu þess, en sökum féleysis þessa geðþekka gufubaðsunnanda hefur enginn verið við störf í húsinu frá því í nóvember.
Veiðilækur er kærkomin viðbót við þá verkamannabústaði sem þjóðin á nú þegar. Þar eru aðstæður góðar fyrir hvers konar tjaldferðalög og mannamót og húsið gæti veitt að minnsta kosti tíu venjulegum fjölskyldum skjól fyrir veðri og vindum. Staðurinn er þó skjólsæll og útsýnið yfir Norðurárdalinn með eindæmum fagurt. Hrossagaukar gala í brekkunum og rebbi skýst yfir móa í miðnætursólinni. Hraustleg alþýða með svefnpoka og vasapela gerir slíkar aðstæður óneitanlega fegurri en pungsveittur píreygur bankastjóri á stolnu handklæði.
Þjóðnýtingin fór fram á degi íslenskra kvenna 19. júní og var baráttufánanum bleika flaggað af því tilefni, þótt varla hreyfði vind. Fáninn var gerður upptækur af útsendurum Sigurðar strax um kvöldið, en verkakonur höfðu slegið upp tjaldbúðum bak við næsta hól og voru komnar aftur á stjá morguninn eftir.
Framkvæmdakonur færðu íslenskri alþýðu eina flösku af Funky Llama-rauðvíni í tilefni þjóðnýtingainnar. Hún mun vera fyrsta flaskan í hinum veglega vínkjallara Sigurðar, sem hann ætlaði eflaust dýrari veigum.
Gestabók verkamannabústaðanna að Veiðilæk var vígð. Eru allir gestir, í hvaða tilgangi sem þeir heimsækja bústaðina, hvattir til að bæta nöfnum sínum í gestabókina. Allt sem þarf er svartur túss!
Húsreglur í verkamannabústöðunum að Veiðilæk eru einfaldar: Gangið betur um sameignina en fyrri eigandi. Landið er okkar - niður með auðvaldið!
Til að komast á Veiðilæk er ekið eftir þjóðveginum í gegnum Borgarnes og áfram upp í Norðurárdal en beygt til hægri rétt áður en komið er að vegasjoppunni Baulu - vegurinn sem beygt er inn á er númer 50. Eftir stuttan spöl er beygt aftur til vinstri, veg 527. Ekið er framhjá Varmalandi, en þar tekur malarvegur við. Eftir nokkurn akstur klofnar vegurinn og er þá tekinn afleggjarinn til vinstri. Eftir það er Veiðilækur fyrsti bær á vinstri hönd, eftir dágóðan spotta. Vegurinn frá Varmalandi er fólksbílafær en seinfarinn og leiðinlegur svo betra er að vera á stærri bíl ef mögulegt er. Þó er minnt á að Sigurður Einarsson gat dröslað fjórum tröllauknum byggingarkrönum þessa leið.
